kahan hai, mainay poocha
us ne aik kaghaz per pata likh diya. kaghaz mujhay daitay howay kaha, mera naam le lijiye
Qaisar, Ahmed Bashir, Isfaq Hussain, Insha or main aglay roz ikathay ho kar Atiya se ja milay.
wo aik sanjeeda, kam go, ba wakar or taleem yafta khatoo thi. wahan kamray main kuch or log bhi baithay thay.
jee farmaye wo har sail se poochti. jab wo apni beeti suna chukta to gardan jhuka kar baith jati. kuch der yoonhi baithi rehti, phir sir utha kar muskarati or sawal ka jawab de daiti.
Qaisar k baad meir baari thi. mainay kaha mujhay kuch nahi poochna
aap Mumtaz Mufti hain? Atiya ne poocha
jee, mainay jawab diya
shahab sahib ne mujhay aap ki mutalliq phone kia tha
Ahmed Bashir bola, darasal ye shakhs apni sarisht ke khilaf kisi ko peer man baitha hai
Atiya muskarai, wo buzurg kahan hain jinhain peer maan baithay hain?
Pindi main
Atiya ne murakbay main sir jukha diya. chand sa-at baad sir uthaya. boli, wo khud aa gaye. oonchay, lambay, goray, chittay, sir per roomi topi thi. hath main hukka tha, punjabi booltay hain kehnay lagay: tu rehan day, asi apay seedha kar laan gay.
main soch main par gaya. isay kaisay pata chala ke wo roomi topi pehantay hain, hukkah peetay hain or punjabi boltay hain. or wo khud kaisay aa gaye. aik marhoom o maghfoor budha Pindi se Karachi kaisay aa gaya or phir lehja bhi to unhi ka tha. ye sab kya hai. ye kaisi duniya hai jahan log marnay ke baad azadana ghoomtay phirtay hain.
---------------------------------------------------
mainay faisla kia ke Atiya se akailay main miloo or isay poochoo ke ye gift usay kaisay mila. mainay telephone pe Atiya se wakt manga, wo man gaye.
mainay kaha mohtarma, aap ko mustaqbil ki jhalkian kaisay nazar aati hain? wo muskarai kehnay lagi kabhi mehsoosaat ke zariye jhalki nazar aati hai, kabhi aankhon ke samnay tasveer aa jati hai, kabhi aawazain sunai daiti hain or kabhi deewar pe film chalnay lagti hai.
aap kab se ye jhalkian dekh rahi hain
bachpan hi se, jab mujhay poori tarah shaoor nahi tha
phir us ne mujhay apnay bachpan ki mukhtasir si kahani sunai:
aik din parosan ki saas beemar par gaye. us ne shor macha diya ke jao doctor ko bula lao. us wakt main mareeza ke paas khari thi. mainay mareeza ki taraf dekha or mujhay yoon nazar aaya jaisay wo mar chuki ho. mainay buland awaz main kaha ab doctor ko bulanay ka kya faida, ye to mar chuki hai. ye keh kar main ghar chali aye. doctor ke pohanchnay se pehlay mareeza fot ho gaye. meri ye baat saray muhallay main mashhoor ho gaye. phir logo ne mujh se sawal poochna shuru kar diye. jab main in sawalaat per tawajju daiti to mujh per mehsoosat tari ho jatay jis ke mutabiq main unhain bata daiti ye ho jaye ga ya nahi.
kehnay lagi log samajhtay hain ye imtyazi salahiyat hai, ghalat samajhtay hain, mustaqbil ko jan laina bari takleef de baat hai. jab meray walid fot howay tab mainay jana tha ye kis kadar takleef de baat hai.
us roz mainay dekha ke aik kafan urta urta khirki se kamray main dakhil ho gaya or doosri charpaye per aa kar tik gaya. aik adh minute wo wahan para raha phir tehleel ho gaya. mainay shiddat se mehsoos kia keh aaj is kamray main koi fot honay wala hai. us roz das bajay mainay kafan ka manzar dekha tha. das bajay se teen bajay tak mujh per goya naza ka aalam tari raha. main mar mar ker jeeti rahi. main baar baar apnay mian or abba ko phone karti rahi, teen bajay wo ghar aaye to kuch tasalli howi. phir char bajay ke kareeb abba ke pait main dard utha or wo usi charpai per lait gaye jis per kafan tika raha tha. meray mian ne doctor ko phone kia laikin doctor ki amad se pehlay hi abba rukhsat ho gaye.
ESP (Extra Sensory Perception) ka mutalia karnay ki wajah se mujhay seers k baray main kuch maloomat hasil thee. mujhay ilm tha ke kuch logo ko paidaishi tor per mustaqbil ki jhalkian nazar aati hain. or kuch logo main sir ki chot lagnay per ye khasoosiat ubhar ati hai. mujhay ye bhi ilm tha ke is khasoosiat ko mazhab se koi ta-alluk nahi hai, laikin hairat ki baat thi ke Atiya ko mazhab se gehra ta-alluk tha.
Atiya ki kahani sun ker mainay jan liya k wo seer hi nahi kuch or bhi hai
Mumtaz Mufti Alakh Nagri
(his autobiography)
No comments:
Post a Comment